vendredi 3 août 2007

توجيهات السيد الرئيس و أخبار الساعة 8

مــانيش باش نحكي على التوجيهات اللي كان يعطيها الزعيم قبل أخبار الساعة 8 ... لكن اليوم باش نحكي على نشرة الأنباء في القنوات الفرنسية ... اللي منذ صغري و هي محيـــرتني : توا معقول ما يتعرضوش في نشرتهم الإخبارية للنشاط اليومي متاع رئيسهم؟

ديما نـــحــتار في القائمين على نشرة أخبارهم ؟ عندهم ميزانية ضخمة وإمكانيات رهيبة ولكن رغم ذلك مستخسرين في رئيسهم درج.. و إلا درجين.. و إلا نصف ساعة.. و إلا حتى الأخبار لكل.. لتغطية حرصه الخاص و جهوده المتواصلة و رعايـته الموصولة لكافة أطياف الشعب الفرنسي المــلتف حول سيادته...

وكي نتفرج في الأخبار الفرنساوية, ديما نستغرب في طريقة تسيير أمورهم: ياخي ما عندهمش كبير؟؟؟

ما عندهمش شكون يجتمع ...و يلتقي ... و يبحث... و يأمر... و يوصي... و يشدد... و يؤكد... ويعطف... و يرعى... ؟؟؟

يـــاخي رئيسهم ما يتلقــّــاش برقيات تهنــئــة في الأعياد الوطنية و الدينية من جميع رؤساء الدول الصديقة و الشقيقة؟؟ و شبيه بدوره ما يبعــثـــش برقيات يهـــنــيهم فيها بأعيادهم ؟؟؟ يـــاخي رئيسهم ما يُـــشرفش على المواكب الدينية؟؟؟ ما يمشيش للكنيسة في الـــعيد باش يُشرف على موكب ديني خاشع ؟؟ زعما ما يتقــبــلش التهاني من أعضاء السلك الديبلوماسي المُعتمدين في فرنسا ؟؟؟

و شبيه ما يـــُلـــقيش خطاب في جميع المناسبات , يؤكد فيه على حجم الإنجازات التي تحققت و يُعلن فيه على جُملة من الإجراءات الرائدة للإرتقاء بجميع القطاعات ؟؟؟ ... آش بيه ما يعملش خطاب بمناسبة يوم العلم ... ويوم المرأة؟... و يوم الطفل؟ ...و يوم الكهل؟... و يوم الصغير و الكبير واللي يدبي عالحصير... ويوم البيئة؟... و يوم الصحة؟... و يوم الشغل؟... و يوم الراحة؟...

و علاش هالرئيس ما يجـــتمعش يومــيا بوزير وإلا زوز... للوقوف على حجم الإنجازات التي تحققت في برنامج الوزارة و أنشطتها ؟؟؟ و شبيه ما يعـــقدش مجلس وزاري مُضيق ... يُــعلن فيه عن إجراءات إستثنائية لكسب رهانات المرحلة القادمة ؟؟؟

ياخــي رئيسهم ما يدشــنــش المشاريع ؟؟؟ شبيه ما يــحطش حجر الأساس لأشغال توسعة مستوصف في جبال البيريني؟؟؟

يـــاخي رئيسهم ديـــما في كونجي؟؟؟... وإلا بُــخــلي برشا و ماهوش ناشط ؟؟؟... و إلا زعما يكونوش جماعة التلفزة عاملين عليه مؤامرة و يحبوا يطيــحوه ؟...شـــبيهم مـــعــتمين عليه؟؟؟

يكـــونشي هـــو حَــشّـــام و متواضع برشا و ما يحبش يتعدى في التلفزة و مــوصيهم باش ما يقلقوشي و يتركوه يعمل في صمت؟؟...

لو فرضنا اللي رئيسهم ما يُظهرش في الأخبار لأنه بُخلي و حـــشام و ديما فاصع مالخدمة و ما يحبش الأضواء و الظهور في الأنباء = ...تي هاو رغم ذلك فرانسا أمورها ماشية .. بلا وصاية و بلا عناية و بلا توجيهات... و مازالت مالثمانية الكبار...

مع كل سؤال... أزداد إشمئزازا و حيرة... و غيرة.

16 commentaires:

Gouverneur de Normalland a dit…

je crois que jma3at eltelvza el françaoiya huoma essbab ...ma 3andhom ghayra 3al watan ...ou mahoumch lehiin bih belgda !

il faut dire elli houma ma 3andhoumch rokhass binaa bech yssalkouha mo9abel dharbét bindir !

FREE-RACE a dit…

@gouverneur:
شوية مالحنة...و شوية من رطابة اليدين:)

Big Trap Boy a dit…

أنا مستغرب كيفاش ما يقولوش: إبتسم، إنها فرانسا... ياخي ما يعرفوش يبتسمو وإلاّ ما فيبالهمش إلّي الإبتسام بالسيف؟؟

M.o.u.l.i.n a dit…

تي هوّا رئيس هذاكا لاهوّا لا مرتو لاعندو جرد دوكتوراه, لا من ايطاليا ولا حتّى مالكنقو؟

هاذمكا حاشمين بيه على خاطر ماهوش يحاول باش يرفع رهانات المستقبل في اطار منظومة هيكليّة تضمن للمواطن الفرنسي مكوّنات العيش الكريم في اطار العولمة ممّا يدفع بالدّور الرّيادي للقيادة الرّشيدة للحكومة في المحافل الدّوليّة.

تي هاربين عليهم يا ولدي

Anonyme a dit…

:D
Ena kenou i9oulouli "Hay jet tawjihet errais, barra or9od, demain, tu as cours".

Mnt, je le regrette, en 7 ans machba3tech bih Bourguiba!!

Téméraire a dit…

Berjoulia, féch toksod, wé ké anni fhemt haja okhra ???.

Allah yal3nek yé chitane, el wéhed mokhou fin yhézzou.

3ala kol hal, hétoumka jmé3et el 35 heures, mé yalkawech el wakt, béch ya3mlou el hajét hadhika el koll.

Tarek طارق a dit…

أما تعرف يا فري رايس كي تقارن التلفزة الفرنسية بالأمريكية فما نفس المشكل تقريبا.... يقعد فما أبوية في فرنسا و "تغطية نشاط الحكومة" هي فكرة ماخذينها من عند الفرنسيس... أيا أيجا نهار لحد عاد بش إناقشو

Anonyme a dit…

ON a pas les mêmes valeurs!
les français ont coupé le cordon ombilical avec le Père de la nation. "les autres", comprend qui voudra, ont encore besoin d'étre guidé comme un troupeau de moutons de panurge :)
et ont la 5ouffa dans le sang
rabbi yéhdi
excellent post!

FREE-RACE a dit…

@big trap boy:
:))ذلك يدخل في إطار سياسة "الدبوزة" اللي مازالو يكتبو فوق الغطاء متاعها: يُفتح من هنا
@ m.o.u.l.i.n:
زعما ما يجي نهار .. و يخلظوا علينا؟ ولا مكتوب علينا باش نكونوا ديما سابقينهم؟؟
@ abc-juris:
كلامك صحيح: التوجيهات... تجيب النوم :)
@ téméraire :
توا فهمت علاش قاللهم:
il faut travailler plus...pour gagner plus...
@ tarak kahlaoui:
خسارة خويا طارق ما أنجمش نجي نهار الأحد.. لكن فوضت حاكم النورمالاند باش ينقل تحياتي للجميع وباش ينقلي تقرير مفصل على إجتماع "البيوا
@ eljélia etounisia el barra:
pour le moment, on a pas les memes valeurs...mais on a pas les memes ambitions.

Werewolf a dit…

ما عندهمش شكون يجتمع ...و يلتقي ... و يبحث... و يأمر... و يوصي... و يشدد... و يؤكد... ويعطف... و يرعى... ؟؟؟

Je pense que tu as oublié le verbe: يأذن

Transit World a dit…

ya khouia rabi ikhalin atouness sab3 ou akhbarha eljihaouia ouel ma7alia ouel efriquia kan elem
Betoukit el mahali li madinet touness bien sur ; )

Anonyme a dit…

c simple l'ERTT est une chaine nationale dirigé par l'état alors que les autres chaine française sont privé indépendants de l'état

FREE-RACE a dit…

@anonyme:
c pas vrai, plusieurs chaines françaises sont des chaines publiques.

brastos a dit…

صحيح كلامك يا فري رييس..مشكلة فيهم هالفرنسيس.. لا يزّي ما يعرفوش يعملو نشرة أخبار قمقومة .. كيما نعرف..و لا يزّي ما يحبّوش يطّلعو على نشرات الاخبار متاع بلدان اخرين باش يتعلمو منهم..لوقتاش و هوما ما يعرفوش ...

brastos a dit…

اما ملّا ضحكة جبتهالي....برافو عالبوست

Bel Malwene a dit…

bravoooooo ya frrrrrreeeeee !! c vraiment excelent ... tu a un fun club mnt houni ... lawled el kol yestanaw fel les postes mta3ek bel d9i9a !!!