vendredi 27 juillet 2007

التفويت في رزق عمومي = عمي + ولد عمي

ولد عمي ورث مجموعة مِالمشاريع الناجحة اللي عــايش بيها مستور ... ديما يتشكى مالمردودية متاع الخدامة لكن و الحق يُقال هو زادة مقصّر معاهم و مش مخلصهم كيما يلزم... نازل عليهم بالخدمة و هوما ساكتين و صابرين بحكم اللي عايلاتهم و صغارهم يسترزقو من هالخدمة...

نهار مالنهارات , ولد عمي قرر باش يزيد يترقى في السلم الإجتماعي... دَبْـرُوا عليه الصْحاح باش يعمل قرض باهي مالبانكة... و يدوّر الزيرو بمشاريع يستنفع بيها و ينفع اهالي القرية معاه... البانكة على طول وافقت بحكم اللي هو مش خْصَيّص و يملك ما يترهن...لكن شرطوا عليه شرط صْغيرون: شِرطوا عليه باش يدَخّل معاه شركاء في أملاكه السابقة و في مشاريعه المستقبلية...

رغم اللي هو مْسَــــتـَكْ ... حسْ اللّي فما ملعوب فالحكاية و تردد شوي... لكن القدْعان داروا بيه و طمْنوه و ذَكْروه بالأمثلة الناجحة من حرفاء البانكة واللي أعمالهم ماشية و تتحسن... الحَصيلو خذا قرض باهي مقابل رهن ما يملك و في نفس الوقت هـَـــبّط إعلانات في الصحافة يلوّّج على شكون يُـــدخل معاه شريك في المشاريع المُتواجدة و في المشاريع المَوعُودة...

بسرعة, تهافتوا عليه الشركاء ...وهو من فرط الحيرة ما عرفش يختار:

نهارت اللي هَــبّــــط إعلان يلوج في شريك في التاكسيفون (ولد عمي يملك تاكسيفون ناجح برشا في راس النهج)...هبطوا عليه زوز معروفين في البلاد : الاول إقترح عليه باش يعطيه 5 ملاين و يزيد يتكفل بخلاص تقني سامي متكون في الأتصالات يُشرف على التاكسيفون, يتعهد بصيانة معداته و ينظر في إمكانية تحويله إلى مركز عمومي للأنترنات في أقرب الآجال ... الثاني إقترح عليه 7 ملاين لكن ما يتكَــفــل بشيْ: فقط كل راس شهر يعمل طلة و ياخذ نصيبه مالأرباح...

بالزْهَـر, نهارتها صادف مع نهار خلاص الخدامة وهو مستحق لفلوس " إسْـبَـاس" باش يخلصهم...لذلك وافق بدون تردد على العرض الثاني... رغم هالبهامة , ولد عمي ما يفَــلّــتْــش فرصة إلا و يفتخر بحجم الصفقة اللي حققها...

الأدهى و الأَمَـر, اللي هو توا بصدد بيع جميع أملاك العايلة... و حتى مالكوشة باعها لواحد فرنساوي... هالفرنساوي جابِلها " فُورْ إلكتريك" و طَــرّد عم علي و 4 خدامة أخرين كانوا يسهرو للفجر يخدموا, باش في الصباح ناكلو كرواسون سخون...

أما القرض اللي خذاه, هو مش قادر باش يتصرف في حتى مليم منه , البانكة ترا اللي الشركاء اللي دخلهم معاه مؤهلين أكثر للتفاوض في سُــبل صرف القرض : وسمعت اللي قاموا بشراء جزء من مستوصف القرية لأنهم شافوا اللي هالمستوصف ديما معَــبي و ديما العباد مستحقة للقطاع الطبي...

أما الشيْ اللي مخوفني فعلا , فهو آخر نشاطات ولد عمي : سمعت الي هو يحب يشري المدرسة أو على الأقل يُـــدخل فيها شريك.... ولد عمي ما قراش و هو صغير... لذلك حَب يُدخل للمدرسة من الباب الكبير و هو ... كـــــــبـــــيــــر.

7 commentaires:

Bel Malwene a dit…

Malla weld 3amek wmala howa !! nchalah rabi ykhalih lel 9aria !!
3omoumen ... 3amek w weld 3amek yestahlou lawm el 3am wel khass 3la 3mahom ... haw tal3ou a7ref men wled 3am 3moumi ana ... w kima y9oul el mathal el 3oumoumi "ken mech 3mahom ma n3ichou m3ahom" ;)!!!

Anonyme a dit…

vraiment j'ai beaucoup aimé le blog; él7asilou ya3tik éssé77a..

cactussa a dit…

ca fait pleurer!!!

Téméraire a dit…

Ya3tik essaha, parce que j'ai écrit pareille histoire sur weld 3ammi qui parait être weld 3ammek zada mais je n'ai jamais eu le temps de la finaliser et le sujet aussi était à propos de son taxiphone et tous ces biens.

Quelle coincidenc, youdhorli ahna ezzouz wled 3am, inchallah weld 3ammna mé ybi3néch zada.

FREE-RACE a dit…

@mriwene: t'es sure ke houma 3amiya?? ya wildi zid thabét? yatla3chi yra 5ir mennék ;)
@elyes: شكرا
@cactussa : c'est pour cela ktebt bech nechkilkom men bhémet weld 3ammi ...
ma n7ebech nebki wa7di :(
@ téméraire: c'est sure que lkolna wléd 3amna :) lkolna fi flouka wa7da.

Anonyme a dit…

:-) 7keya mou3abra...inti fi beli ta7ki 3al tounes :-) ..mriwene ..9al el 7a9 ..a7na ittwensa ..walla 9oul 3ammat icha3b ...3mi..rabbi

Anonyme a dit…

7abbit nikhtem ou nid3i ...rabbi inawarna